Тошкент шаҳридаги кўчалардан бирига Туркия Республикаси асосчиси Мустафо Камол Отатурк номи берилади. Бу Президент Шавкат Мирзиёев томонидан 15 июнь куни имзоланган тегишли қарорда белгиланган.
Ҳужжатга мувофиқ, Яшнобод туманида барпо этилаётган "Ўзбек-турк дўстлиги" хиёбонига туташ ҳудуддаги Абдулла Қодирий кўчасининг бир қисми Мустафо Камол Отатурк номи билан аталади.
Гап Истиқбол, Фарғона йўли ва Нукус кўчалари кесишмасидан бошланиб, Абдулла Қодирий кўчаси ҳамда Маҳтумқули шоҳкўчаси кесишмасигача бўлган йўл қисми ҳақида бормоқда.
Мазкур қарор Ўзбекистон ва Туркия ўртасидаги стратегик шериклик ва қардошлик муносабатларини янада мустаҳкамлаш йўлидаги навбатдаги рамзий қадам сифатида баҳоланмоқда.
Эслатиб ўтиш жоиз, аввалроқ Туркиянинг Ҳатай вилояти Арсуз туманида Ўзбекистон томонидан қуриб берилган турар жой мажмуаси негизида ташкил этилган «Ўзбекистон маҳалласи», шунингдек, Шавкат Мирзиёев булвари ҳамда Тошкент ва Самарқанд кўчаларининг тантанали очилиш маросими бўлиб ўтган эди.
