Ўзбекистонда давлат хизматчилари учун жазони ижро этиш муассасалари ва тергов ҳибсхоналарига профилактик ташрифлар ташкил этиш амалиёти жорий этилмоқда.
Қайд этилишича, мазкур ташаббус давлат хизматчиларига коррупциявий ҳуқуқбузарликларнинг оғир оқибатларини амалда кўрсатиш орқали уларда бундай хатти-ҳаракатларга нисбатан муросасиз муносабатни шакллантириш мақсадида йўлга қўйилмоқда.
Агентликка кўра, ташрифлар давомида давлат хизматчилари тергов хоналари, ҳибсда сақланаётган шахслар учун мўлжалланган камералар ҳамда муассасаларнинг бошқа инфратузилма объектлари билан яқиндан танишади.
Шунингдек, коррупциявий жиноятлар учун жазо ўтаётган шахслар билан учрашув ва мулоқотлар ҳам ташкил этилади. Бу орқали хизмат ваколатларидан фақат халқ ва давлат манфаатлари йўлида фойдаланиш масъулиятини кучайтириш, ҳалоллик ва қонун устуворлиги тамойилларига содиқликни ошириш кўзда тутилган.
Режага мувофиқ, дастлабки ташрифларда Қурилиш ва уй-жой коммунал хўжалиги вазирлиги, Камбағалликни қисқартириш ва бандлик вазирлиги ҳамда Кадастр агентлиги раҳбарияти ва масъул ходимлари иштирок этади. Кейинги босқичларда эса бошқа вазирлик ва идоралар раҳбарлари, шунингдек, коррупциявий хавф-хатарлар юқори бўлган соҳаларда фаолият юритаётган давлат хизматчилари қамраб олинади.
