Тошкент халқаро инвестиция форуми доирасида Ўзбекистон Президенти Шавкат Мирзиёев Хитой Халқ Республикаси Миллий энергетика бошқармаси раҳбари Ван Хунчжи бошчилигидаги делегацияни қабул қилди.
Учрашувда Хитойнинг йирик энергетика, саноат ва молия институтлари вакиллари иштирок этди. Жумладан, "China Energy Engineering Corporation", "China Datang", "Sinoma Energy Conservation", "China Southern Power Grid", "CAMCE", "CNNC", "State Nuclear Uranium Resource Development" компаниялари раҳбарлари ҳамда "The Export-Import Bank of China" ва "Bank of China" вакиллари қатнашди.
Музокараларда энергетика ва геология соҳаларидаги юқори технологик лойиҳаларни илгари суриш, шунингдек, банк-молия йўналишидаги амалий ҳамкорликни кенгайтириш масалалари муҳокама қилинди.
Давлат раҳбари Ўзбекистон ва Хитой ўртасидаги савдо-иқтисодий ҳамда инвестициявий алоқалар жадал суръатларда ривожланаётганини таъкидлади. Қайд этилишича, жорий йилнинг ўтган даврида икки мамлакат ўртасидаги товар айирбошлаш ҳажми 6 миллиард доллардан ошган. Шунингдек, Хитойдан жалб қилинган тўғридан-тўғри инвестициялар ҳажми 8 миллиард доллардан ортиқни ташкил этган. Айни пайтда мамлакатда қарийб 6 мингта Ўзбекистон–Хитой қўшма корхонаси фаолият юритмоқда.
Учрашувда «яшил» энергетика соҳасидаги лойиҳаларга алоҳида эътибор қаратилди. Бугунги кунда Хитой компаниялари иштирокида Ўзбекистонда қуёш ва шамол электр станциялари ҳамда энергия сақлаш тизимлари қурилмоқда.
Шу билан бирга, фотоэлектр станциялар қувватини кенгайтириш, агровольтаика технологияларини жорий этиш ва янги электр узатиш тармоқларини барпо этиш бўйича ташаббуслар қўллаб-қувватланди.
Томонлар чиқиндиларни қайта ишлаш орқали энергия ишлаб чиқариш, дата-марказлар ташкил этиш ва бошқа замонавий технологик ечимларни ривожлантириш соҳасидаги ҳамкорлик истиқболларини ҳам муҳокама қилди.
Шунингдек, тоғ-кон ва геология соҳасида конларни қидириш ва ўзлаштириш, муҳим хомашё ресурсларини етказиб бериш бўйича узоқ муддатли шерикликни йўлга қўйиш масалалари кўриб чиқилди.
Музокараларда Хитойнинг етакчи банклари билан молиявий ҳамкорликни кенгайтириш, инфратузилма лойиҳаларини молиялаштириш, ирригация тизимларини модернизация қилиш, юқори тезликда ҳаракатланишга мўлжалланган автомобиль йўллари ва гидроэлектростанциялар қуриш, қишлоқ хўжалиги техникасини етказиб бериш ҳамда кичик ва ўрта бизнесни қўллаб-қувватлаш масалаларига ҳам алоҳида эътибор қаратилди.
Учрашув якунида Хитой делегацияси вакиллари давлат раҳбарига очиқ ва самарали мулоқот учун миннатдорлик билдириб, эришилган келишувларни тўлиқ амалга оширишга тайёр эканини маълум қилди.
