АҚШнинг Техас штатида олти кишини олиб кетаётган кичик самолёт автомагистралга қулаб тушди. Ҳодиса оқибатида камида бир киши ҳалок бўлган.
Associated Press агентлиги хабар беришича, воқеа 16 июнь куни Ларедо шаҳри яқинида содир бўлган. Самолёт Мексиканинг Лос-Кабос халқаро аэропортидан парвоз қилган бўлиб, Ларедо халқаро аэропортига қўниш вақтида ҳалокатга учраган.
Қулашдан сўнг ҳаво кемаси автомагистрал четида ёнбошлаб қолган ва кучли ёнғин чиққан. Ҳодиса гувоҳларининг айтишича, ҳайдовчилар транспорт воситаларини ташлаб, самолётдагиларни қутқариш учун воқеа жойига югурган. Айримлар кабина ойнасини синдиришга уриниб, ичида қолганларни чиқаришга ҳаракат қилган.
Дастлабки маълумотларга кўра, самолётда бўлган уч нафар ўсмир ва учувчи ташқарига чиқишга муваффақ бўлган. Шунингдек, яна бир ҳушсиз йўловчини қутқариш бўйича уринишлар амалга оширилган.
Расмийлар маълум қилишича, ҳодиса оқибатида камида бир киши ҳалок бўлган, бир неча киши турли даражада жароҳат олган. Ҳалок бўлган шахс самолёт ичида бўлганми ёки ердаги одамми, ҳозирча аниқ эмас.
Ҳодиса вақтида қутқарув ишларида иштирок этган айрим полициячилар ва ўт ўчирувчилар тутундан заҳарланиш аломатлари билан шифохонага ётқизилган.
Дастлабки тахминларга кўра, ҳалокатга техник носозлик сабаб бўлган бўлиши мумкин. Айни вақтда воқеа юзасидан расмий тергов ҳаракатлари олиб борилмоқда.
