Колумбияга қарши учрашувдан кейин “Opta” аналитика компанияси суперкомпьютери 2026 йилги Жаҳон чемпионатида иштирок этаётган жамоаларнинг имкониятларини қайта ҳисоблаб чиқди. Бу ҳақда компания маълумотларида келтирилган.
Янгиланган прогнозга кўра, Ўзбекистон миллий терма жамоасининг ўз гуруҳида биринчи ўринни эгаллаш эҳтимоли 0,99 фоизни ташкил этмоқда. Жамоанинг плей-офф босқичига чиқиш имконияти эса 21,9 фоиз деб баҳоланган.
Суперкомпьютер ҳисоб-китобларига кўра, Ўзбекистоннинг 1/16 финалга чиқиш эҳтимоли ҳам 21,9 фоизни ташкил этади. Терма жамоанинг нимчорак финалга йўл олиш имконияти 4,55 фоиз, чорак финалга чиқиш эҳтимоли 1,26 фоиз деб кўрсатилган.
Шунингдек, Ўзбекистоннинг ярим финалга чиқиш имконияти 0,33 фоиз, финалга етиб бориш эҳтимоли 0,08 фоиз этиб баҳоланган. Жамоанинг жаҳон чемпиони бўлиш эҳтимоли эса 0,01 фоизни ташкил қилмоқда.
“Opta” прогнозларига кўра, ҳозирча Франция терма жамоаси турнирнинг асосий фаворити бўлиб турибди. Суперкомпьютер томонидан ўтказилган 10 мингта симуляциянинг 15,73 фоизида французлар чемпион сифатида қайд этилган.
Чемпионлик учун асосий даъвогарлар рўйхатидан Англия ва Аргентина ҳам ўрин олган. Англиянинг чемпионлик эҳтимоли 12,33 фоиз, амалдаги жаҳон чемпиони Аргентинага эса 12,28 фоиз имконият берилган.
Маълумот учун, турнир бошланишидан олдин Испания бош фаворит сифатида баҳоланган эди. Бироқ биринчи турдаги мағлубиятдан кейин испанларнинг чемпионлик эҳтимоли 12,08 фоизга тушиб, улар рейтингда тўртинчи ўринга пасайган.
