Андижон вилоятида ўтказилган тезкор тадбирлар давомида қарийб 2,5 килограмм гашиш моддаси мусодара қилинди. Бу ҳақда Давлат хавфсизлик хизмати маълум қилди.
Қайд этилишича, ДХХнинг Андижон вилояти бўйича бошқармаси, Ички ишлар ва Божхона органлари ходимлари ҳамкорлигида Асака туманида ўтказилган тезкор тадбирда “Lasetti” русумли автомобил тўхтатилиб, текширувдан ўтказилган.
Текширув жараёнида транспорт воситасида бўлган Наманган шаҳри ҳамда Фарғона вилоятининг Марғилон шаҳрида яшовчи 1970, 1981 ва 1984 йилларда туғилган уч нафар фуқарога тегишли 2 килограмм гашиш моддаси борлиги аниқланган. Ҳолат процессуал тартибда расмийлаштирилган.
Шунингдек, Марҳамат туманида ўтказилган яна бир тезкор тадбирда Қува шаҳрида яшовчи, 1985 йилда туғилган фуқаро бошқарувидаги “Cobalt” русумли автомобилдан 497 грамм гашиш моддаси ашёвий далил сифатида олинган.
Маълум қилинишича, мазкур турдаги гиёҳвандлик воситалари мамлакат ҳудудига хориждан контрабанда йўли билан олиб кирилган бўлиши мумкин.
Ҳозирда ҳар икки ҳолат юзасидан жиноят ишлари қўзғатилиб, гумонланувчиларга нисбатан қамоқ эҳтиёт чораси қўлланган. Тергов ҳаракатлари давом этмоқда.
