Эндиликда Ўзбекистонда фойдаланиш муддати тугаган автомобилларни утилизацияга топширмаган фуқаролар базавий ҳисоблаш миқдорининг 30 баравари миқдорида экологик компенсация тўлаши мумкин.
Чиқиндиларни бошқариш агентлиги маълум қилишича, мамлакатда эски транспорт воситаларини сотиб олиб, утилизация қилиш тизимини жорий этиш режалаштирилмоқда. Унга кўра, ишлаб чиқарилганига 30 йил ва ундан ортиқ бўлган автомобиллар эгаларидан бозор нархида баҳоланиб, сотиб олинади ҳамда утилизацияга йўналтирилади.
Шу билан бирга, автомобиль эгалари билан ҳисоб-китоб турли шаклларда амалга оширилиши мумкин. Жумладан, янги автомобил харидида бошланғич тўлов сифатида электрон ваучер тақдим этиш ёки унинг пул кўринишида тўлаб бериш амалиёти жорий этилади.
Истеъмолчилар мазкур ваучерлар орқали маҳаллий ишлаб чиқарилган янги автомобилларни имтиёзли шартларда харид қилиш имкониятига эга бўлади. Бунда ваучер қиймати миқдорида чегирма берилади, қолган сумма эса бир йилдан ортиқ муддатга бўлиб тўланиши мумкин.
Эски автомобилни белгиланган тартибда утилизацияга топширмаган фуқаролар эса йилига бир маротаба базавий ҳисоблаш миқдорининг 30 баравари миқдорида экологик компенсация тўлайди.
Маълумот учун, бундай амалиёт дунёнинг 60 дан ортиқ давлатида қўлланилади. Жумладан, Франция, Германия, Япония, Хитой ва АҚШ каби мамлакатларда эски автомобилларни утилизация қилиш ва уларни янгисига алмаштиришни рағбатлантирувчи дастурлар йўлга қўйилган.
Эслатиб ўтамиз, аввалроқ Ўзбекистонда эски транспорт воситаларини янгисига алмаштириш ёки уларга фильтр ўрнатиш бўйича давлат қўллаб-қувватлаши жорий этилиши мумкинлиги ҳақида хабар берилган эди.
