Эрон Ислом инқилоби қўриқчилари корпуси (ИИҚК) Ҳормуз бўғози кемалар ҳаракати учун қайта ёпилганини эълон қилди. Теҳрон бу қарорни АҚШ ва Исроил томонидан сулҳ келишуви шартлари бузилгани билан изоҳламоқда. Бу ҳақда Reuters хабар берди.
Маълум қилинишича, мазкур қарор 18 июнь куни АҚШ президенти Дональд Трамп ва Эрон президенти Масъуд Пезешкиён ўртасида имзоланган вақтинчалик тинчлик келишувидан бир неча кун ўтиб қабул қилинган. Ушбу келишув қарийб тўрт ой давом этган қуролли тўқнашувларга барҳам беришни назарда тутган эди.
ИИҚК баёнотида Ҳормуз бўғозига яқинлашган кемалар хавф остида қолиши мумкинлиги таъкидланган. Теҳрон Исроилнинг Ливан жанубидаги ҳарбий ҳаракатлари ҳамда Вашингтоннинг келишув бўйича мажбуриятларини бажармаётганини асосий сабаб сифатида келтирмоқда.
Шу билан бирга, АҚШ вице-президенти Жей Ди Вэнс яқин кунларда Швейцарияга бориб, Эрон билан музокараларда иштирок этишини маълум қилди. Унинг айтишича, томонлар ўртасидаги келишув ҳали ҳам амал қилмоқда ва Вашингтон Ҳормуз бўғози ёпилганини тасдиқловчи аниқ далиллар йўқлигини билдирган.
Маълумотларга кўра, АҚШнинг махсус вакиллари Жаред Кушнер ва Стив Уиткофф аллақачон Швейцарияда бўлиб, музокараларнинг техник жиҳатларини муҳокама қилмоқда. Эрон ташқи ишлар вазирлиги ҳам ўз делегацияси музокаралар учун йўлга чиққанини тасдиқлаган.
Ҳормуз бўғози дунёдаги энг муҳим энергетик йўлаклардан бири ҳисобланади. У орқали жаҳон нефти ва суюлтирилган газ савдосининг катта қисми амалга оширилади. Бу йўлакнинг ёпилиши глобал энергия бозорига жиддий босим ўтказиб, нефть нархлари ошиши ва инфляция хавфини кучайтириши мумкин.
