Россиянинг Томск вилоятидаги 3-сонли ахлоқ тузатиш колониясида сақланаётган Ўзбекистон фуқаролари ҳолидан хабар олинди. Бу ҳақда “Дунё” ахборот агентлиги маълум қилди.
Ўзбекистон Бош консулхонаси дипломатлари муассасага ташриф буюриб, жазо ўтаётган ватандошлар билан суҳбатлашган. Маълумотларга кўра, колонияда ҳозирда қарийб 70 нафар Ўзбекистон фуқароси сақланмоқда.
Учрашувлар давомида маҳкумларнинг мурожаатлари ўрганилиб, ҳуқуқий масалалар бўйича тушунтиришлар берилган. Шунингдек, уларга хориждаги ҳарбий ҳаракатларда иштирок этиш Ўзбекистон қонунчилигига кўра жиноий жавобгарликка сабаб бўлиши ҳақида эслатилган.
Ташриф чоғида бир қатор муаммолар ҳам жойида ҳал қилинган. Жумладан, астма касаллиги билан оғриган маҳкумга тиббий ёрдам кўрсатилиши таъминланган, икки нафар фуқаронинг паспорт расмийлаштириш бўйича аризалари қабул қилинган.
Шу билан бирга, май ойида озодликка чиққанидан сўнг яқинлари билан алоқаси узилган ўзбекистонлик фуқаронинг манзили аниқланиб, бу ҳақда унинг оиласига хабар берилган.
