Тошкентда “Gonzo” тахаллуси билан танилган блогер Гейдар Алиев К-Vibe корейс маданияти фестивалидаги можародан сўнг маъмурий жавобгарликка тортилди. Бу ҳақда “Podrobno” нашри маълум қилди.
Суд қарорига кўра, у майда безорилик ва ҳуқуқни муҳофаза қилувчи органлар ходимларининг қонуний талабларига бўйсунмаганликда айбдор деб топилган. Блогерга 5 сутка маъмурий қамоқ ва БҲМнинг 5 баравари миқдорида жарима тайинланган.
Маълумотларга кўра, воқеа 13 июнь куни Тарас Шевченко кўчасида бўлиб ўтган корейс маданияти фестивали вақтида содир бўлган. Блогер тадбирни жонли эфирда ёритиш чоғида иштирокчиларни тасвирга олган ва шундан сўнг можаро юзага келган.
Қайд этилишича, фестивал қатнашчилари уни видеога олишни тўхтатишни сўраган, аммо блогер бу талабга амал қилмаган. Вазиятга ички ишлар ва Миллий гвардия ходимлари аралашган.
Ҳодиса ижтимоий тармоқларда кенг муҳокамаларга сабаб бўлган. Ҳозирча ҳуқуқни муҳофаза қилувчи органлар томонидан расмий баёнот берилмаган.
