Ўзбекистонда ўтказилган кенг кўламли хатловлар натижасида 464 та ёқилғи қуйиш шохобчаси фаолияти вақтинча тўхтатилди. Бу ҳақда Вазирлар Маҳкамасининг 18 июнь куни қабул қилинган қарорида маълум қилинди.
Қайд этилишича, республика бўйича жами 6 минг 196 та суюлтирилган ва сиқилган газ, нефть маҳсулотлари қуйиш шохобчалари ҳамда газ тўлдириш станция ва пунктлари текширувдан ўтказилган.
Хатловлар давомида жами 46 минг 737 та қоидабузарлик ва камчиликлар аниқланган. Уларнинг 2 минг 218 таси қурилиш, 7 минг 949 таси ёнғин хавфсизлиги, 25 минг 341 таси саноат ва техника хавфсизлиги, 3 минг 354 таси техник жиҳатдан тартибга солиш ҳамда 7 минг 875 таси технологик жараёнларга оид экани маълум қилинган.
Шунингдек, текширувлар жараёнида 7 минг 166 та камчилик жойида бартараф этилган.
Ҳукумат қарорига мувофиқ, 2026 йил 1 сентябрдан бошлаб хизмат муддати тугаган ёки ишлаб чиқарилган санаси аниқ бўлмаган, ортиқча босим остида ишловчи ускуналардан фойдаланиш 2030 йил 1 январга қадар чекланади.
Бундан ташқари, жорий йилнинг 1 сентябрига қадар инсонлар ҳаёти ва соғлиғига хавф туғдирадиган, шаҳарсозлик, саноат ҳамда ёнғин хавфсизлиги талабларига жавоб бермайдиган шохобчаларнинг махсус реестри шакллантирилади.
Кейинчалик хавфли деб топилган объектларни босқичма-босқич хавфсиз ҳудудларга кўчириш бўйича алоҳида чора-тадбирлар ишлаб чиқилади.
Маълумот учун, мазкур хатлов ишлари Қашқадарё вилояти Қарши туманидаги газ қуйиш шохобчасида юз берган портлаш ва унда 6 нафар инсон ҳалок бўлган воқеадан кейин кучайтирилган тартибда ўтказилган.
