Сурхондарё вилоятининг Сариосиё туманида кучли ёғингарчиликлар ортидан юзага келган сел оқими халқаро аҳамиятга эга автомобиль кўпригига зарар етказди. Бу ҳақда Zamon.uz маълум қилди.
Маълум қилинишича, 21 июнь куни кузатилган сел тошқини оқибатида туманнинг “Боғи Самарқанд” ва “Ширин” маҳаллалари ҳудудидаги айрим аҳоли хонадонлари ҳамда томорқаларига сув кирган.
Шунингдек, табиий офат М-41 “Бишкек — Душанбе — Термиз” халқаро автомобиль йўлида жойлашган, Ўзбекистон ва Тожикистонни боғловчи кўприкка ҳам зарар етказган.
Дастлабки хулосаларга кўра, ёғингарчиликлар натижасида дарёда сув сатҳи ва оқим тезлиги кескин ошган. Бу эса кўприк таянчларига юқори босим тушишига сабаб бўлиб, иншоотнинг бир қисми шикастланган.
Қайд этилишича, 1977 йилда қурилган мазкур кўприк орқали ҳаракат хавфсизлик нуқтаи назаридан вақтинча чекланган.
Ҳозирда транспорт воситалари ҳаракати Узун тумани ҳудудидаги айланма йўналишлар орқали ташкил этилган. Мутахассислар томонидан кўприкнинг техник ҳолати ўрганилиб, зарар кўламини баҳолаш ишлари олиб борилмоқда.
