Россиянинг Свердловск вилоятида 22 июнь куни кечқурун кучли қуюн кузатилди. Табиий офат оқибатида ўнлаб уйлар зарар кўрган, камида 16 киши жароҳат олган.
Маълум қилинишича, қуюн дастлаб Малая Лая қишлоғида кузатилган. Кейинчалик у кучайиб, Кушва шаҳригача етиб борган. Энг катта зарар айнан шу ҳудудда қайд этилган.
Фавқулодда вазиятлар хизмати маълумотига кўра, аҳолиси 27 минг нафарга яқин бўлган Кушва шаҳрида 99 та хусусий уй шикастланган. Уларнинг 32 таси бутунлай вайрон бўлган.
Табиий офат оқибатида 16 киши турли даражада жароҳат олган. Жабрланганлардан бири қўли синган ҳолда Нижний Тагил шаҳридаги шифохонага ётқизилган.
Шунингдек, электр узатиш тармоқларига етказилган зарар туфайли бир неча минг истеъмолчи электр таъминотисиз қолган. Айрим ҳудудларда ичимлик суви таъминотида ҳам узилишлар кузатилган.
Хавфсизлик нуқтайи назаридан Кушва шаҳрида газ таъминоти вақтинча тўхтатилган. Ҳудудда фавқулодда ҳолат режими жорий этилган ва аҳоли учун вақтинча жойлаштириш пунктлари ташкил этилган.
Маҳаллий нашрларнинг ёзишича, коммунал хизматлар офат оқибатларини бартараф этиш ишларини давом эттирмоқда. Шу муносабат билан аҳолидан кўчаларни тозалаш ишларида кўмаклашиш сўралган.
Метеорологлар эса бундай экстремал об-ҳаво ҳодисалари бошқа ҳудудларда ҳам кузатилиши мумкинлигидан огоҳлантирмоқда. Мутахассислар буни атмосферадаги экстремал жараёнлар сони ортиши билан изоҳламоқда.
