Саудия Арабистони ҳаж мавсумига тайёргарлик доирасида зиёратчилар хавфсизлигини таъминлаш ҳамда ҳаж амалларини хавфсиз ва тартибли ўтказишга қаратилган бир қатор янги чеклов ва тартибларни эълон қилди. Бу ҳақда Zamon.uz маълум қилди.
Саудия Ички ишлар вазирлиги маълумотига кўра, 2026 йил 13 апрелдан бошлаб Маккага киришни истаган аҳоли ваколатли органлардан расмий рухсатнома олишлари шарт бўлади. Рухсатномасиз шахсларнинг шаҳарга кириши тақиқланади. Маккада берилган яшаш рухсатномаси эгалари, Ҳаж рухсатномаси борлар ҳамда “Аbsher Individual” ва “Мuqeem” платформалари орқали электрон тарзда берилган ва “Тасреэҳ” тизими билан интеграциялашган иш рухсатига эга шахслар Маккага кира олади.
Шунингдек, Умра визаси билан Саудия Арабистонига кирган фуқаролар учун мамлакатни тарк этишнинг якуний муддати 2026 йил 18 апрель этиб белгиланди.
Вазирлик қарорига кўра, 2026 йил 18 апрелдан 2026-йил 31 майгача Саудия фуқаролари, Форс кўрфази араб давлатлари фуқаролари, резидентлар ҳамда бошқа визага эга шахслар учун “Nusuk” платформаси орқали Умра рухсатномаларини бериш вақтинча тўхтатилади.
Бундан ташқари, 18 апрелдан бошлаб Ҳаж визасига эга бўлмаган барча виза тоифасидаги шахсларнинг Маккага кириши ёки у ерда қолиши тақиқланади.
Ички ишлар вазирлиги ушбу тартибларга риоя қилинмаган тақдирда қонунчиликда белгиланган жазо чоралари қўлланишини маълум қилди.
Маълумот ўрнида, “Ҳаж – 2026” мавсумидан бошлаб ҳаж сафарига борувчи ҳар бир зиёратчидан тиббий соғломлик тўғрисидаги расмий гувоҳнома талаб қилинади. Ушбу гувоҳнома Саудия Арабистонининг расмий “Nusuk” платформаси орқали тасдиқланиши лозим.
