Ўзбекистонда коррупция ва иқтисодий жиноятлар учун жазо чоралари янада қатъийлаштирилди. Эндиликда пора олиш, пора бериш, фирибгарлик ёки ўзлаштириш ва растрата йўли билан талон-торож қилиш каби жиноятларда айбдор деб топилган шахслар айрим ҳолатларда жазодан муддатидан илгари шартли равишда озод қилинмайди.
Бу ҳақда жорий йилнинг 22 июнь куни қабул қилинган “Ўзбекистон Республикасининг айрим қонун ҳужжатларига коррупцияга қарши курашиш самарадорлигини оширишга, коррупцияга оид жиноятлар учун жавобгарлик муқаррарлигини таъминлашга қаратилган қўшимча ва ўзгартиришлар киритиш тўғрисида”ги Қонунда белгиланган.
Қонун билан Жиноят кодексининг бир қатор моддаларига ўзгартиш ва қўшимчалар киритилди. Хусусан, Кодекснинг 73-моддасига қўшилган янги нормага мувофиқ, ўзлаштириш ёки растрата қилиш йўли билан талон-торож қилиш ҳамда фирибгарлик учун ҳукм қилинган шахслар етказилган зарарни тўлиқ қопламагунига қадар муддатидан илгари шартли озод этилиши мумкин эмас.
Шунингдек, такроран ёки хавфли рецидивист томонидан, ёхуд жуда кўп миқдорда пора олиш, пора бериш ва пора олиш-беришда воситачилик қилиш жиноятлари учун судланганларга нисбатан ҳам мазкур имтиёз қўлланилмайди.
Маълум қилинишича, Олий Мажлис Сенати томонидан жорий йилнинг 25 май куни маъқулланган мазкур қонун 22 июнь куни Президент томонидан имзоланиб, расман эълон қилинган кундан эътиборан кучга кирган.
