Фарғона вилояти ва Жиззах вилоятида электр таъминоти корхоналари муҳандисларининг коррупциявий ҳаракатларига чек қўйилди. Бу ҳақда Давлат хавфсизлик хизмати маълум қилди.
Қайд этилишича, Фарғона тумани электр таъминоти корхонаси муҳандиси фуқарога тегишли қурилиш маҳсулотлари ишлаб чиқариш цехига электр тармоғи тортиш, электр ҳисоблагич ўрнатиш ва уни тармоққа улаш, шунингдек, мансабдор танишлари орқали рухсат берувчи ҳужжатларни расмийлаштириб бериш эвазига 100 миллион сўм талаб қилган.
Давлат хавфсизлик хизмати Фарғона вилояти бошқармаси ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбирда муқаддам судланган мазкур муҳандис сўралган маблағни олган вақтида ашёвий далиллар билан ушланган.
Шунингдек, Жиззах вилоятининг Шароф Рашидов тумани электр таъминоти корхонаси муҳандиси ҳам маҳаллий фермер хўжалигининг электр энергиясидан фойдаланиш бўйича мавжуд 122 миллион сўм қарздорлигини мансабдор танишлари орқали бекор қилдириб беришни ваъда қилиб, 50 миллион сўм талаб қилган.
Маълум бўлишича, у аввалдан 10 миллион сўм олган бўлиб, Давлат хавфсизлик хизмати ва Иқтисодий жиноятларга қарши курашиш департаменти ходимлари томонидан ўтказилган тезкор тадбирда қолган 40 миллион сўмни олаётган вақтида қўлга олинган.
