Тошкент шаҳри ҳокимлиги тизимида фаолият юритаётган 29 нафар ходим жиноят содир этгани аниқланган. Бу ҳақда Халқ депутатлари Тошкент шаҳар Кенгашининг Тошкент шаҳар ҳокимлиги коррупцияга қарши ички назорат хизмати фаолияти натижаларига бағишланган қарорида маълум қилинди.
Ҳужжатда қайд этилишича, ҳокимлик тизимидаги ходимлар томонидан жами 1 минг 353 та маъмурий ҳуқуқбузарлик ҳолати содир этилган бўлиб, уларнинг барчаси белгиланган тартибда расмийлаштирилган.
Шунингдек, Миробод, Чилонзор, Юнусобод ва Яшнобод туманлари ҳокимларининг тўрт нафар ёрдамчиси ҳамда Яккасарой тумани ҳокимининг қурилиш ва экология масалалари бўйича ўринбосари билан коррупция ва манфаатлар тўқнашувининг олдини олиш юзасидан профилактик суҳбатлар ўтказилган.
Маълум қилинишича, давлат хизматчиларининг тадбиркорлик фаолияти билан шуғулланиши ва манфаатлар тўқнашувига йўл қўйиши долзарб муаммолардан бири бўлиб қолмоқда. Ўтказилган ўрганишлар натижасида 167 нафар ходимнинг тижорат ташкилотларида иштироки мавжудлиги аниқланган.
Ушбу ҳолатларни бартараф этиш мақсадида бир қатор чоралар кўрилган. Жумладан, олти нафар ходимнинг 20 та тадбиркорлик субъектидаги таъсисчилик фаолияти тугатилган, 13 нафар ходим билан меҳнат шартномаси бекор қилинган. Шунингдек, етти та тижорат ташкилоти тугатиш жараёнига ўтказилган, икки таси эса давлат реестридан чиқарилган. Тўрт нафар ходимнинг раҳбарлик лавозимларидаги фаолияти чекланган.
Қайд этилишича, жами 49 нафар ходим билан профилактик суҳбатлар ўтказилган бўлса, 55 нафар ходимга нисбатан Одоб-ахлоқ комиссиялари томонидан огоҳлантириш чораси қўлланган.
Таҳлилларга кўра, 2026 йил январь ойида қабул қилинган қарор ва фармойишларнинг 50,4 фоизи яширин тарзда жойлаштирилган бўлган. Апрель ойига келиб эса очиқ эълон қилинган қарорлар улуши 67 фоизга етказилган.
Шу билан бирга, Комплаенс ва коррупцияга қарши ички назорат хизмати томонидан 350 та қарор лойиҳаси кўриб чиқилиб, уларнинг еттитаси рад этилган, 153 таси эса мувофиқлаштирилган.
Маълумотларга кўра, ўтказилган ўрганишлар натижасида Тошкент шаҳар ҳокимлигининг захира жамғармаси маблағлари ҳисобидан 2 миллиард сўм миқдоридаги маблағни тежашга эришилган.
Ишга қабул қилиш учун тавсия этилган 83 нафар номзоддан 75 нафари бўйича ижобий хулоса берилган. Саккиз нафар номзоднинг ўтмиши ёки фаолиятидаги шубҳали ҳолатлар сабабли уларга нисбатан салбий хулоса тақдим этилган.
