Судьялар олий кенгашининг 2026 йил 24 июндаги қарори билан бир қатор судьяларни қайта тайинлаш ва лавозимлардан озод этиш масалалари кўриб чиқилди.
Қарорга мувофиқ, бир нафар судья муддатсиз даврга, 12 нафар судья эса судьялик ваколати муддати даврига қайта тайинланди. Тайинловлар доирасида айрим судьялар бошқа ҳудудларга ўтказилди, шу муносабат билан эгаллаб турган лавозимларидан озод этилди.
Шу билан бирга, беш нафар судьянинг ваколатлари муддатидан илгари тугатилди.
Жумладан, Тошкент вилояти судининг жиноят ишлари бўйича судьяси Бахтиёр Розиқов, Хоразм вилояти судининг фуқаролик ишлари бўйича судьяси Мавсума Йўлдошева ҳамда Фарғона вилояти жиноят ишлари бўйича Қўштепа туман суди раиси Раҳматжон Арапов ўз аризаларига кўра лавозимидан озод этилди.
Шунингдек, Андижон вилояти Андижон туманлараро маъмурий суди судьяси Сардорбек Мўминов ва Тошкент вилояти жиноят ишлари бўйича Бекобод шаҳар суди судьяси Хуршид Холиқов Судьялар одоби кодекси талабларини бузгани учун судьялик ваколатидан маҳрум қилинди.
Қайд этилишича, мазкур қарорлар “Судлар тўғрисида”ги Қонуннинг тегишли моддалари асосида қабул қилинган.
Эслатиб ўтамиз, аввалроқ Ўзбекистон Республикаси Президенти томонидан Робахон Маҳмудовани Олий суд раиси лавозимига сайлаш тўғрисидаги тақдимнома Олий Мажлис Сенатига киритилган эди.
Жорий йилнинг 18 июнь куни Сенат томонидан Робахон Маҳмудова Олий суд раиси лавозимига беш йил муддатга сайланган. 22 июнь куни эса Президент Администрацияси раҳбари Саида Мирзиёева уни судьялар ҳамжамияти ва ҳуқуқни муҳофаза қилувчи органлар раҳбарларига таништирган.
