Ўзбекистон Республикаси Президенти Шавкат Мирзиёев бугун, 25 июнь куни Америка Қўшма Штатларининг Савдо вакили Жеймисон Грирни қабул қилди. Бу ҳақда Президент матбуот хизмати хабар берди.
Маълум қилинишича, учрашув аввалида Жеймисон Грир давлат раҳбарига АҚШ Президенти Дональд Трампнинг самимий саломи ва эзгу тилакларини етказган.
Музокаралар чоғида Ўзбекистон ва АҚШ ўртасидаги стратегик шериклик муносабатларини, айниқса савдо-иқтисодий ҳамкорликни янада ривожлантириш масалалари муҳокама қилинган.
Томонлар кейинги йилларда ишбилармонлик алоқалари фаоллашгани, ўзаро товар айирбошлаш ҳажми ва инвестиция кўрсаткичлари изчил ўсиб бораётганини мамнуният билан қайд этган.
Шунингдек, яқинда ўтказилган Тошкент халқаро инвестиция форуми доирасида Америка компаниялари вакиллари иштирокида бўлиб ўтган давра суҳбатининг амалий натижалари кўриб чиқилган.
Учрашувда Ўзбекистоннинг Жаҳон савдо ташкилотига аъзо бўлиш жараёни ҳам муҳокама қилиниб, мазкур йўналишда АҚШ томонининг кўмаги ва қўллаб-қувватловини давом эттириш муҳимлиги таъкидланган.
Бундан ташқари, янги инвестиция ва бизнес лойиҳаларини илгари суриш мақсадида Америка – Ўзбекистон ишбилармонлик ва инвестиция кенгаши имкониятларидан самарали фойдаланиш зарурлиги қайд этилган.
