Ўзбекистон Республикаси Президенти Шавкат Мирзиёев Матбуот ва оммавий ахборот воситалари ходимлари куни муносабати билан соҳа вакилларидан бир гуруҳини давлат мукофотлари билан тақдирлаш тўғрисидаги фармонни имзолади.
Ҳужжатга кўра, мамлакатда сўз ва матбуот эркинлигини ривожлантириш, ахборот соҳасида фуқароларнинг конституциявий ҳуқуқларини таъминлаш, давлат ва жамият бошқарувида очиқлик ва ошкоралик тамойилларини мустаҳкамлаш, миллий манфаатларни халқаро ахборот майдонида ҳимоя қилиш ҳамда Янги Ўзбекистонда амалга оширилаётган ислоҳотларни кенг ёритишга қўшган ҳиссаси учун бир қатор журналист, блогер ва медиа соҳаси вакиллари мукофотланган.
Жумладан, «Меҳнат шуҳрати» ордени билан «Севимли» телеканали бошловчиси Фарҳод Абдуллаев, публицист Тулқун Казакбаев, контент тайёрлаш маркази мутахассиси Азиза Қурбонова ва «Бувайда кўзгуси» газетаси бош муҳаррири Азизахон Солиева тақдирланган.
«Дўстлик» орденига блогер Зуҳри Атабекова, «ТАСС» агентлигининг Ўзбекистондаги мухбири Валерий Бирюков, шунингдек, бир қатор нашрлар ва телеканаллар вакиллари муносиб кўрилган.
«Келажак бунёдкори» медали билан Kun.uz мухбири Шоҳрух Мажидов, Platina.uz ва Pinkod.uz лойиҳалари асосчиси Равшанбек Мелиқўзиев ҳамда «Sinchalak blog» саҳифаси муаллифи Маҳлиё Тўлқинова тақдирланган.
Шунингдек, «Шуҳрат» медали билан ЎзА, Daryo.uz, UzReport TV, «Менинг юртим», «Zo‘r TV», «Milliy» ва Ўзбекистон Миллий телерадиокомпаниясида фаолият юритувчи қатор журналистлар, муҳаррирлар, операторлар ва медиа ходимлари мукофотланган.
Фармон билан мукофотланганлар орасида блогерлар, мухбирлар, муҳаррирлар, теле ва радио ходимлари, матбуот котиблари ҳамда нашриёт соҳаси вакиллари бор.
Давлат раҳбари мазкур соҳа вакилларининг мамлакатда очиқлик, ошкоралик ва сўз эркинлигини таъминлашдаги хизматларини алоҳида эътироф этган.
