Қирғизистон парламенти — Жогорку Кенеш мамлакат президенти ва парламент депутатлари сайловларини ўтказиш тартибига доир конституциявий қонунга киритилаётган ўзгартиришларни уч ўқишда маъқуллади. Бу ҳақда Zamon.uz хабар берди.
Маълум қилинишича, қонунчилик ташаббуси мамлакат Президенти томонидан илгари сурилган бўлиб, унда президентлик сайловларини ўтказиш муддатлари ва тартибини аниқ белгилаш кўзда тутилган.
Қирғизистон Марказий сайлов комиссияси раиси Тинчтик Шайназаровнинг айтишича, ўзгартиришлар амалдаги қонунчиликни Конституция талабларига мувофиқлаштириш ҳамда сайлов санасини аниқ белгилаш мақсадида ишлаб чиқилган.
Янги тартибга кўра, президентлик сайловлари ҳар етти йилда январь ойининг тўртинчи якшанбасида ўтказилади. Шунингдек, овоз бериш санаси камида тўрт ой олдин расман эълон қилиниши шарт.
Мазкур ўзгаришлардан келиб чиқиб, Қирғизистонда навбатдаги президентлик сайловлари 2027 йил 24 январь куни ўтказилиши режалаштирилмоқда.
Жогорку Кенеш раиси Марлен Маматалиевнинг таъкидлашича, янги тартиб сайловчилар иштирокини ошириш ва овоз бериш жараёнини янада самарали ташкил этишга хизмат қилади.
Қонун лойиҳаси эндиликда имзолаш учун Қирғизистон Президентига юборилади. Ҳужжат давлат раҳбари томонидан имзоланиб, расмий эълон қилинганидан кейин кучга киради.
