АҚШ ҳарбийлари Эрон ҳудудидаги бир қатор нишонларга зарбалар берди. Бу ҳақда АҚШ Марказий қўмондонлиги Centcom маълум қилди.
Маълум қилинишича, зарбалар ракета ва дрон сақлаш иншоотлари ҳамда қирғоқ радиолокация нуқталарига қаратилган. АҚШ томони ушбу ҳаракатни ўтган куни савдо кемасига уюштирилган дрон ҳужумига жавоб сифатида изоҳламоқда.
Аввалроқ АҚШ президенти Дональд Трамп Эронни Ҳормуз бўғозида юк кемасига қилинган ҳужумдан сўнг эълон қилинган сулҳни “аҳмоқона равишда бузганлик”да айблаган эди.
Эрон томони эса юк кемаси “рухсатсиз ҳаракат қилгани” учун нишонга олинганини билдирган.
Centcom баёнотида қайд этилишича, Эрон кучларининг савдо кемаларига қаратилган ҳаракатлари ўт очишни тўхтатиш келишувини аниқ бузиш ҳисобланади. Шу билан бирга, ушбу ҳаракатлар халқаро савдо йўлакларида ҳаракат хавфсизлигига таҳдид солаётгани таъкидланган.
Эроннинг Исломий инқилобий қўриқчилар корпуси (IRGC) эса АҚШни “келишувни бузишда” айблаб, ўз кучлари минтақадаги АҚШ ҳарбий позицияларига жавоб зарбалари берганини маълум қилди. Бироқ бу ҳақда қўшимча тафсилотлар келтирилмаган.
Теҳрон томони АҚШ ҳужумларини Ҳормуз бўғозидаги вазият билан боғлиқ баҳона деб атаган.
Маълумот учун, Ҳормуз бўғози нефть ва газ ташувчи кемалар учун энг муҳим халқаро йўлаклардан бири ҳисобланади. Бу ҳудуддаги ҳар қандай беқарорлик жаҳон энергетика бозорига жиддий таъсир кўрсатиши мумкин.
Айни пайтда вазият юзасидан халқаро ҳамжамият томонидан хавотир билдирилмоқда.
