Малайзияда гиёҳвандлик воситалари контрабандасида айбланиб, ўлим жазосига ҳукм қилинган уч нафар Ўзбекистон фуқаросининг жазоси 30 йиллик қамоқ жазоси билан алмаштирилган. Бу ҳақда Ташқи ишлар вазирлиги Матбуот котиби Омонулла Файзиев маълум қилди.
Маълум қилинишича, мазкур ҳолат 2010 йил сентябрь ойида содир бўлган. Ўзбекистон фуқаролари Н.С., Н.Д. ва Ж.Ж. Куала Лумпур халқаро аэропортида 12 килограммдан ортиқ гиёҳвандлик воситасини олиб ўтишга уринган вақтда Малайзия ҳуқуқни муҳофаза қилувчи органлари томонидан қўлга олинган. Кейинчалик суд уларни ўлим жазосига ҳукм қилган.
ТИВга кўра, фуқароларнинг ҳуқуқ ва қонуний манфаатларини ҳимоя қилиш мақсадида Ўзбекистоннинг Малайзиядаги элчихонаси 2013, 2014, 2016 ва 2020 йилларда Малайзия Ташқи ишлар вазирлиги, Бош прокуратураси, Олий суди ҳамда мамлакат қироли номига уларни афв этиш бўйича бир неча марта расмий мурожаат киритган.
Қайд этилишича, 2018 йилда Малайзияда ўлим жазосини қўллашга мораторий жорий этилган. Шунингдек, 2024 йил 18 мартдан кучга кирган қонун асосида Малайзия Олий суди мазкур уч нафар ўзбекистонликка нисбатан чиқарилган ўлим жазосини 30 йил муддатга озодликдан маҳрум қилиш жазоси билан алмаштирган.
Малайзия қонунчилигига мувофиқ, жазони ижро этиш тартиби ва яхши хулқ-атвор учун белгиланган имтиёзлар ҳисобга олинса, ушбу фуқароларнинг жазо муддати 2030 йилда якунланиши кутилмоқда.
Ҳозирда улар Малайзиянинг Селангор штатидаги Кажанг қамоқхонасида жазо муддатини ўтамоқда. Ўзбекистоннинг Малайзиядаги элчихонаси томонидан улар билан мунтазам консуллик учрашувлари ўтказилиб, зарур ҳуқуқий ва консуллик кўмаги кўрсатиб келинмоқда.
