Ўзбекистон миллий терма жамоаси ҳимоячиси Беҳруз Каримовга Европанинг кучли бешлик чемпионатларида иштирок этаётган бир нечта клуб қизиқиш билдирмоқда. Бу ҳақда футболчининг ўзи Тошкент халқаро аэропортида миллий жамоани кутиб олиш маросимида маълум қилди.
Каримовнинг айтишича, айни пайтда унга бир нечта клубдан расмий таклифлар келиб тушган ва томонлар ўртасида музокаралар давом этмоқда. Футболчи барча вариантларни синчиклаб ўрганиб, ўзи учун энг мақбул қарорни қабул қилишини айтди.
Шунингдек, у келажакда тўп суришни орзу қиладиган клуб сифатида Испаниянинг "Реал Мадрид" жамоасини тилга олди.
"Колумбияга қарши биринчи ўйинда стадионда 80 мингдан ортиқ маҳаллий мухлис бор эди. Шунга қарамай, бизнинг мухлисларимиз бутун учрашув давомида дарвозамиз ортида тинимсиз қўллаб-қувватлаб туришди. Бу бизга янада катта куч бағишлади ва айнан шу мухлислар учун ҳам майдонда боримизни беришимиз кераклигини ҳис қилдик. Албатта, меҳнатнинг самараси бўлади. Қўлимиздан келганича ҳаракат қилдик. Худо хоҳласа, бундан кейин ҳам меҳнатимизни янада ошириб, яхши натижаларга эришамиз", деди Каримов.
Маълумот учун, Беҳруз Каримов Ўзбекистон миллий терма жамоаси сафида жаҳон чемпионати доирасида Колумбия ва Португалияга қарши ўтказилган ҳар икки учрашувда ҳам тўлиқ 90 дақиқа майдонда ҳаракат қилди.
Аввалроқ Ўзбекистон миллий терма жамоасининг яна бир футболчиси Жаҳонгир Ўрозов фаолиятини Германиянинг "Боруссия Мёнхенгладбах" клубида давом эттириши мумкинлиги ҳақида хабар берилган эди.
