Global Citizen Solutions компанияси томонидан 2026 йил учун тузилган Global Passport Index (GPI) рейтинги эълон қилинди. Унга кўра, Ўзбекистон дунёдаги энг кучли паспортлар рейтингида 123-ўринни эгаллади.
Мазкур рейтинг паспортларни нафақат визасиз саёҳат қилиш имкониятлари, балки инвестициявий жозибадорлик ҳамда ҳаёт сифати каби мезонлар асосида ҳам баҳолайди. Шу жиҳати билан у фақат визасиз кириш мумкин бўлган давлатлар сонига таянадиган Henley Passport Index рейтингидан фарқ қилади.
Марказий Осиё давлатлари орасида энг юқори натижани Қозоғистон қайд этган бўлиб, мамлакат 107-ўринни эгаллаган. Ундан кейин Ўзбекистон (123), Қирғизистон (127), Тожикистон (140) ва Туркманистон (144) жойлашган. Афғонистон эса 197-ўрин билан рейтингнинг энг сўнгги поғонасидан ўрин олган.
Ўзбекистон алоҳида йўналишлар бўйича мобиллик индексида 129-ўрин, инвестициявий жозибадорликда 89-ўрин ҳамда ҳаёт сифати индексида 119-ўринни қайд этган.
2026 йилги рейтингга кўра, дунёдаги энг кучли паспорт Швецияга тегишли деб топилди. Мамлакат мобиллик бўйича 11-ўрин, инвестициялар бўйича 9-ўрин ва ҳаёт сифати бўйича 2-ўринни эгаллаган.
Иккинчи поғонадан Швейцария жой олган. У мобиллик бўйича 7-ўрин, инвестициялар бўйича 2-ўрин ва ҳаёт сифати бўйича 36-ўринда қайд этилган.
Учинчи ўрин Финляндияга насиб этган. Мамлакат мобиллик бўйича 4-ўринни, инвестициялар бўйича 28-ўринни эгаллаган бўлса, ҳаёт сифати индексида дунёда биринчи ўринни сақлаб қолган.
Тўртинчи поғона Германияга насиб этган. Шунингдек, кучли бешликни Нидерландия ва Дания якунлаган. Рейтингнинг кучли ўнталигига Ирландия, Буюк Британия, Норвегия ҳамда Сингапур ҳам кирган. Эътиборлиси, биринчи ўнталикдан ўрин олган давлатларнинг тўққизтаси Европа мамлакатлари ҳисобланади. Сингапур эса Европадан ташқари мазкур рўйхатга кирган ягона давлат бўлди.
Эслатиб ўтамиз, 2026 йил апрель ойида эълон қилинган Henley Passport Index рейтингида Ўзбекистон 74-ўринга кўтарилган эди. Унгача мамлакат 75-поғонада қайд этилган бўлиб, Марказий Осиёда энг юқори ўринни Қозоғистон паспорти эгаллаган ва у 61-поғонадан жой олган.
