Қайд этилишича, мазкур лойиҳа шаҳарда замонавий шаҳарсозлик андозаларини жорий этиш, аҳоли учун қулай яшаш шароитларини яратишга қаратилган. Массив 25 минг нафар аҳоли учун мўлжалланган бўлиб, бу ерда 84 та кўп қаватли уй, таълим муассасалари, боғчалар, олий ўқув юрти, савдо ва бизнес марказлари ҳамда дам олиш ҳудудлари барпо этилади.
Лойиҳа учун жами 1 триллион 850 миллиард сўм маблағ йўналтирилган. Ҳозиргача биринчи босқич якунланиб, 4 минг 394 та хонадондан иборат 56 та ўн қаватли уй фойдаланишга топширилган.
Тайёр хонадонлар аҳолига 35 фоизлик бошланғич тўлов, йиллик 16 фоиз ставка ва 20 йиллик муддат билан тақдим этилмоқда.
Ташриф давомида давлат раҳбари янги хонадонлар шароити билан танишиб, лойиҳанинг ижтимоий аҳамиятига эътибор қаратди. Шунингдек, нуронийлар билан мулоқот ўтказилди ва Қўқон шаҳрини ривожлантириш бўйича тақдимот кўриб чиқилди.
