Туркиянинг Муғла вилоятида дарёга чўкиб кетган Ўзбекистон фуқаросининг жасади топилди. Бу ҳақда мамлакатнинг Cumhuriyet нашри хабар берди.
Маълум қилинишича, 21 ёшли Ўзбекистон фуқароси Муғла вилоятининг Сейдикемер туманидаги дарёга чўмилиш учун борган. Узоқ вақт давомида унинг уйга қайтмаганидан хавотирга тушган отаси ўғлини қидириш учун дарё бўйига йўл олган.
Дарё соҳилига етиб келган ота ўғлининг кийимларини топгач, зудлик билан 112 шошилинч хизмат марказига мурожаат қилган. Шундан сўнг ҳудудга қутқарувчилар, жандармерия ва тиббий хизмат ходимлари жалб этилган.
Қидирув ишларида сув ости қутқарувчилари иштирок этган. Бир неча соатлик қидирувдан сўнг йигитнинг жасади дарё тубидан топилиб, сув юзасига олиб чиқилган.
Марҳумнинг жасади суд-тиббий экспертизасини ўтказиш учун Муғла суд-тиббий экспертиза муассасасига юборилган.
Ҳозирда мазкур ҳодиса юзасидан Туркия ҳуқуқни муҳофаза қилувчи органлари томонидан тергов ҳаракатлари олиб борилмоқда. Ўзбекистон фуқаросининг дарёга қандай шароитда чўкиб кетганига аниқлик киритилмоқда.
