Ўзбекистоннинг бир қатор ҳудудларида гиёҳвандлик воситалари ва психотроп моддаларнинг ноқонуний айланмасига қарши ўтказилган тезкор тадбирлар давомида йирик миқдордаги гиёҳвандлик воситалари мусодара қилиниб, каннабис етиштириш билан шуғулланган шахслар аниқланди. Бу ҳақда Давлат хавфсизлик хизмати хабар берди.
Маълум қилинишича, «Хавфсиз ва соғлом юрт» тезкор-профилактик тадбирлари доирасида Давлат хавфсизлик хизмати ҳамда Ички ишлар вазирлиги ходимлари ҳамкорлигида республика бўйлаб махсус рейдлар ўтказилган.
Хусусан, Наманган вилоятининг Норин туманида яшовчи 1961 йилда туғилган фуқаронинг яшаш хонадони кўздан кечирилганда, келгусида сотиш мақсадида сақлаб келинган 1 килограмм 595 грамм марихуана аниқланиб, процессуал тартибда расмийлаштириб олинган.
Наманган вилоятининг Чортоқ туманида эса 1973 йилда туғилган шахс ўз томорқасида 839 туп каннабис ўсимлигини экиб, парваришлаб келгани маълум бўлган.
Самарқанд вилоятида ўтказилган тадбир давомида Ургут туманида яшовчи 1995 йилда туғилган шахс Тойлоқ тумани ҳудудида автомашинада ҳаракатланаётган вақтда тўхтатилган. Текширув чоғида ундан 20 грамм героин ашёвий далил сифатида олинган.
Хоразм вилоятининг Қўшкўпир туманида яшовчи, 1962 йилда туғилган ва муқаддам гиёҳвандлик воситалари савдоси билан боғлиқ жиноят учун судланган шахс 36 туп каннабис ўсимлигини етиштириб келгани ҳам аниқланган.
Шунингдек, Тошкент вилоятининг Янгийўл шаҳрида истиқомат қилувчи, 1973 йилда туғилган, муқаддам шу турдаги жиноят учун судланган фуқаро ўз ҳовлисида ташкил этилган иссиқхонада 22 туп каннабис ўсимлигини парваришлаётгани маълум бўлган.
Андижон вилоятининг Қўрғонтепа туманида яшовчи 1965 йилда туғилган шахс эса ўз томорқасида 10 туп каннабис ўсимлигини парваришлаб келгани фош этилган.
Ҳозирда мазкур ҳолатлар юзасидан терговга қадар текширув ҳаракатлари олиб борилмоқда.
