Италия Бош вазири Жоржа Мелони Туркия Президенти Ражаб Тойиб Эрдўғандан НАТО саммити давомида уни АҚШ Президенти Дональд Трамп билан ёнма-ён жойлаштирмасликни сўраган. Бу ҳақда Haberler нашри хабар берди.
Нашр маълумотига кўра, Анқара шаҳрида ўтаётган НАТОнинг 36-саммити доирасида Мелони расмий тадбирлардаги протокол жойлашуви бўйича мезбон томонга мурожаат қилган. Унинг илтимоси Трамп билан бир қаторда турмасликка қаратилган бўлган.
Таъкидланишича, бунга икки сиёсатчи ўртасида кейинги вақтларда юзага келган кескин муносабатлар сабаб бўлган. Хусусан, саммит арафасида Дональд Трамп ижтимоий тармоқларда Жоржа Мелони ҳақида пост қолдириб, унда "Уни четлатиш учун ордер керак" деган иборани ишлатган.
Haberler талқинига кўра, Мелонининг мурожаати расмий фотосуратга тушиш маросими вақтида янги можаронинг олдини олиш мақсадида билдирилган.
Саммит иштирокчилари билан умумий суратга тушиш пайтида ҳам етакчиларнинг жойлашуви журналистлар эътиборини тортган. Жоржа Мелони Испания Бош вазири Педро Санчес ёнидан жой олган бўлса, Дональд Трамп ундан анча узоқ масофада турган.
Эслатиб ўтамиз, аввалроқ Дональд Трамп Жоржа Мелони G7 саммити чоғида у билан суратга тушишни "ўтиниб сўрагани"ни даъво қилган эди. Италия Бош вазири эса бу иддаоларни рад этиб, уларни "уйдирма" деб атаган.
Шу можаро ортидан Италия Ташқи ишлар вазири Антонио Таяни АҚШга режалаштирилган ташрифини бекор қилгани ҳақида хабарлар тарқалган. Шунингдек, Трамп Мелони билан бошқа дўст бўлишни истамаслигини ҳам билдирган.
