Ўзбекистонда совет даврида қатағон қилинган яна бир гуруҳ ватандошлар оқланди. Бу ҳақда Ўзбекистон Республикаси Олий суди ахборот хизмати хабар берди.
Маълум қилинишича, 1920–1934 йилларда совет ҳокимиятига қарши ҳаракатларда айбланиб жавобгарликка тортилган 161 нафар шахсга нисбатан оқлов ҳукми чиқарилган.
Қайд этилишича, мазкур ишлар Ўзбекистон Республикаси Президентининг 2020 йил 8 октябрдаги “Қатағон қурбонларининг меросини янада чуқур ўрганиш ва улар хотирасини абадийлаштиришга доир қўшимча чора-тадбирлар тўғрисида”ги фармойиши асосида амалга оширилмоқда.
Шу мақсадда республика ишчи гуруҳи ташкил этилган бўлиб, қатағон қурбонларининг номларини тиклаш ва хотирасини абадийлаштириш бўйича махсус “йўл харитаси” тасдиқланган. Изланишлар доирасида мутахассисларга вазирлик ва идораларнинг архив материалларидан фойдаланиш имконияти яратилган.
Шунингдек, Олий судда ҳам аввал реабилитация қилинмаган қатағон қурбонларини оқлаш бўйича алоҳида ишчи гуруҳ фаолият юритмоқда. Унинг изчил фаолияти натижасида сўнгги йилларда жами 1 236 нафар шахс оқлангани қайд этилган.
Сўнгги ишларда 1920–1934 йилларда Туркфронтнинг Фарғона қўшинлар гуруҳи Ҳарбий кенгаши ҳузуридаги Фарғона махсус бўлими ҳамда Ўрта Осиё ва Қозоғистон бирлашган давлат сиёсий бошқармаси ҳузуридаги “Учлик” қарорлари билан судланган бир гуруҳ шахсларга оид жиноят ишлари кўриб чиқилган.
Улар босмачилик ҳаракатларига ёрдам бериш, қуролли гуруҳлар ташкил этиш, совет ҳокимиятига қарши қўзғолон ва аксилинқилобий фаолиятда айбланган.
2026 йил 6 май куни бўлиб ўтган очиқ суд мажлисларида Жиноят-процессуал кодексининг 83-моддасига асосан 8 та жиноят иши бўйича 161 нафар шахсга нисбатан оқлов ҳукмлари чиқарилди.
Эслатиб ўтамиз, 2024 йил 6 май куни ҳам Олий суд жиноят ишлари бўйича судлов ҳайъати томонидан 1930–1938 йилларда ноҳақ жазога тортилган 198 нафар шахс оқланган эди. Бу ишлар Бош прокурор ўринбосари томонидан киритилган кассация протестлари асосида қайта кўриб чиқилиб, қаноатлантирилган.
