Президент Шавкат Мирзиёев “Тошкент – Бекобод” йўналишида йўлга қўйилган янги электропоездда Бекобод шаҳрига ташриф буюрди. Бу ҳақда Президент матбуот хизмати хабар қилди.
Қайд этилишича, мазкур лойиҳа Президентнинг 2025 йил 27 декабрдаги маҳаллий темир йўл йўналишларида йўловчи ташиш ҳажмини 2030 йилга қадар оширишга қаратилган қарори доирасида амалга оширилди.
Маълум қилинишича, узунлиги 192 километр бўлган “Тошкент – Бекобод” темир йўл йўналиши орқали кунига қарийб минг нафар, йилига эса 300 минг нафаргача йўловчи ташиш режалаштирилган.
Мазкур йўналишда олти вагондан иборат, 586 нафар йўловчига мўлжалланган замонавий электропоезд ҳаракатланади. Поезд соатига 120 километргача тезликда юради.
Электропоезд кондиционер ва иситиш тизими, юмшоқ ўриндиқлар, USB қувватлаш ускуналари, Wi-Fi, электрон ахборот таблолари, видеокузатув тизими, велосипедлар учун махсус жойлар ҳамда ногиронлиги бўлган шахслар учун кўтаргичлар билан жиҳозланган.
Президент темир йўл инфратузилмасини янада ривожлантириш, тармоқларни электрлаштириш, йўловчилар учун шароитларни яхшилаш ҳамда вокзалларда хизмат кўрсатиш сифатини ошириш юзасидан мутасаддиларга тегишли топшириқлар берди.
