Янги зеландиялик машҳур актёр Сэм Нилл 13 июль куни 78 ёшида вафот этди. Бу ҳақда унинг оиласи маълум қилди.
Қайд этилишича, актёр Австралиянинг Сидней шаҳрида яқинлари даврасида ҳаётдан кўз юмган. Оила аъзолари унинг вафоти тўсатдан ва кутилмаган ҳолда содир бўлганини билдирган.
Маълум қилинишича, Сэм Нилл сўнгги йилларда қон саратонининг ноёб тури — ангиоиммунобластик Т-ҳужайрали лимфома билан курашиб келган. Унинг яқинлари касаллик ремиссия босқичида бўлганини таъкидлаб, даволаниш жараёнида иштирок этган шифокорларга миннатдорлик билдирган.
Сэм Нилл (тўлиқ исми — Найжел Жон Дермот Нилл) 1947 йил 14 сентябрда Шимолий Ирландиянинг Ома шаҳрида туғилган. Кейинчалик у оиласи билан Янги Зеландияга кўчиб ўтган ва Кентербери университетида таҳсил олган.
Актёр бутун дунёга "Юра даври парки" ҳамда "Юра даври дунёси: Доминион" фильмларида палеонтолог Алан Грант образини гавдалантиргани орқали танилди. У ижодий фаолияти давомида 100 дан ортиқ фильм ва сериалларда, жумладан, "Қизил октябрь учун ов", "Пианино", "Event Horizon", "От шивирловчиси", "Peaky Blinders" ва "Invasion" каби лойиҳаларда роль ижро этди.
Жорий йилнинг апрель ойида Сэм Нилл инновацион даволаш усули туфайли саратонни енгганини маълум қилиб, яна кино оламига қайтишни истаётганини айтган эди. Шунингдек, у аввалроқ The Guardian нашрига берган интервьюсида ўлимдан қўрқмаслигини, аммо яна камида 10–20 йил яшашни хоҳлашини таъкидлаган эди.
