Самарқанд вилоятининг Ургут тумани прокурори ўринбосарига нисбатан жиноят иши қўзғатилди. Бу ҳақда Давлат хавфсизлик хизмати маълум қилди.
Қайд этилишича, Давлат хавфсизлик хизматининг Самарқанд вилояти бўйича бошқармаси Бош прокуратуранинг Шахсий хавфсизлик бошқармаси ҳамда вилоят прокуратураси билан ҳамкорликда ўтказган тезкор тадбирлар давомида мансабдор шахснинг қонунга зид ҳаракатлари фош этилган.
Терговга кўра, у Пастдарғом тумани прокуратурасида ишлаган вақтда маҳаллий масъулияти чекланган жамият томонидан табиий газдан ноқонуний фойдаланиш оқибатида давлатга етказилган 2 миллиард 887 миллион сўмлик зарар миқдорини 805,9 миллион сўмгача камайтириб бериш эвазига воситачилар орқали 6,5 минг АҚШ доллари ва 35 миллион сўм пора олган.
Шунингдек, прокуратура томонидан мазкур МЧЖ мансабдорларига нисбатан Жиноят кодексининг 169-моддаси билан қўзғатилган жиноят иши доирасида зарар миқдорини 150–200 миллион сўмгача камайтириш ҳамда судда енгилроқ жазо тайинланишига ёрдам беришини айтиб, корхона раҳбаридан яна 15 минг АҚШ доллари талаб қилгани билдирилмоқда.
Мансабдорнинг ноқонуний ҳаракатлари юзасидан ашёвий далиллар процессуал тартибда расмийлаштирилган.
Унга нисбатан жиноят иши қўзғатилиб, "қамоқ" эҳтиёт чораси қўлланилган. Ҳозирда дастлабки тергов ҳаракатлари давом этмоқда.
