Бразилия Президенти Луис Инасиу Лула да Силва миллий терма жамоа футболчиларини 2026 йилги Жаҳон чемпионатидаги иштирокидан сўнг мамлакатга қайтмагани учун танқид қилди. Бу ҳақда Globo нашри хабар берди.
Маълум қилинишича, Бразилия терма жамоаси жорий йилнинг 6 июль куни Жаҳон чемпионати 1/8 финалида Норвегияга 1:2 ҳисобида мағлуб бўлиб, мусобақа билан хайрлашган.
Нашр маълумотига кўра, АҚШдан Бразилияга қайтган махсус рейсда мураббийлар штаби ва жамоа ходимларидан ташқари фақат ҳимоячи Данило бўлган. Қолган футболчилар эса АҚШдан тўғридан-тўғри бошқа давлатларга таътилга жўнаб кетган.
Бу ҳолатга муносабат билдирган Президент Луис Инасиу Лула да Силва футболчиларнинг қарорини қаттиқ танқид қилган.
"Миллий терма жамоа самолётида деярли ҳеч ким йўқ эди. Бу қандай шармандалик, қандай уят", деган Бразилия раҳбари.
Маълумот учун, Бразилия терма жамоаси беш карра Жаҳон чемпионати ғолиби ҳисобланади. Шу билан бирга, жамоа сўнгги 36 йил ичида илк бор мундиалда чорак финалга чиқа олмай мусобақани эрта тарк этди.
