Ўзбекистонда паспорт, ID-карта ёки хорижга чиқиш паспортини йўқотганлик учун маъмурий жавобгарликни бекор қилиш режалаштирилмоқда. Бу Президентнинг 15 июлда қабул қилинган қарорида назарда тутилган.
"Аҳолига кўрсатилаётган давлат хизматларини такомиллаштириш ҳамда фуқаролар учун қўшимча қулайликлар яратиш чора-тадбирлари тўғрисида"ги қарорга кўра, Ички ишлар вазирлиги ва Адлия вазирлиги 2026 йил октябрига қадар тегишли таклифларни Вазирлар Маҳкамасига киритиши лозим.
Ҳужжатга мувофиқ, паспорт, ID-карта ёки хорижга чиқиш паспорти йўқотилган ёки яроқсиз ҳолга келтирилган тақдирда фуқарони маъмурий жавобгарликка тортмасдан, қўшимча давлат божи тўлаш орқали янги ҳужжат расмийлаштириш механизмини жорий этиш таклиф этилмоқда. Бунинг учун тегишли норматив-ҳуқуқий ҳужжатлар лойиҳаси ишлаб чиқилади.
Амалдаги тартибга кўра, ID-карта ёки хорижга чиқиш биометрик паспортини йўқотганлик, шунингдек, уларни яроқсиз ҳолга келтирганлик учун БҲМнинг ярим бараваридан уч бараваригача миқдорда жарима қўлланади.
