Тошкент шаҳри Мирзо Улуғбек туманидаги Мустақиллик шоҳ кўчасининг бир қисми қурилиш-таъмирлаш ишларининг навбатдаги босқичи муносабати билан 16 кунга транспорт ҳаракати учун ёпилади. Бу ҳақда Тошкент шаҳри Йўл ҳаракатини ташкил этиш маркази хабар қилди.
Маълум қилинишича, аввалроқ Мустақиллик шоҳ кўчасининг Мирзо Улуғбек кўчаси кесишмасидан Оққўрғон кўчасигача бўлган йўналишида олиб борилган таъмирлаш ишлари якунланган ва мазкур қатнов қисми 16 июль куни соат 02:00 дан бошлаб барча турдаги транспорт воситалари ҳаракати учун очилади.
Шу билан бирга, кўчанинг қарама-қарши йўналишида реконструкция ишлари бошланиши муносабати билан 16 июль куни соат 01:00 дан 31 июль куни соат 22:00 га қадар Мустақиллик шоҳ кўчасининг Паркент кўчаси кесишмасидан Мирзо Улуғбек кўчаси чорраҳасигача бўлган қисми транспорт ҳаракати учун вақтинча ёпилади.
Билдирилишича, чекловлар кўчани тўлиқ реконструкция қилиш, ҳаракат хавфсизлигини ошириш ҳамда ҳайдовчилар, йўловчилар ва пиёдалар учун замонавий йўл инфратузилмасини яратиш мақсадида жорий этилмоқда.
Шу муносабат билан ҳайдовчиларга ҳаракат йўналишларини олдиндан режалаштириш ва айланма йўллардан фойдаланиш тавсия этилди.
