Тошкент метрополитенининг Ер усти ҳалқа йўналишида жойлашган "Турон" метро бекатида том конструкциясининг бир қисми силжиб тушди. Ҳодиса оқибатида икки нафар йўловчи енгил тан жароҳати олди. Бу ҳақда "Тошкент метрополитени" маълум қилди.
Маълум қилинишича, бугун, 16 июль куни соат 14:34 да «Турон» бекатида том конструкциясининг бир қисми силжиган. Йўловчилар хавфсизлигини таъминлаш мақсадида мазкур бекат орқали поездлар ҳаракати зудлик билан вақтинча тўхтатилган.
Ҳозирда мутахассислар ҳодиса сабабларини аниқлаш юзасидан техник ўрганиш ишларини олиб бормоқда.
Қайд этилишича, воқеа натижасида икки нафар йўловчи енгил тан жароҳати олган. Уларга ҳодиса жойининг ўзида биринчи тиббий ёрдам кўрсатилган.
Йўловчиларга қулайлик яратиш мақсадида «Қипчоқ» ва «Қурувчилар» метро бекатлари ўртасида бепул метробуслар қатнови ташкил этилган.
Эътиборлиси, мазкур йўналишда қурилиш сифати билан боғлиқ муаммолар аввал ҳам кузатилган. Жумладан, 2025 йил июнь ойида Транспорт прокуратураси «Технопарк» – «Қипчоқ» участкасида ўтказилган ўрганишлар давомида бир қатор қурилиш камчиликларини аниқлаб, уларни бартараф этиш бўйича кўрсатмалар берган эди. Ўшанда айрим участкаларда рельслар ва шпаллар тўлиқ демонтаж қилиниб, қайта ётқизилган.
Маълумот учун, "Турон" метро бекати "Қурувчилар" – "Қипчоқ" участкаси таркибида 2024 йил 11 март куни фойдаланишга топширилган.
Лойиҳада буюртмачи сифатида "Ўзбекистон темир йўллар"» акциядорлик жамияти, бош пудратчи сифатида эса "Кўприкқурилиш" акциядорлик жамияти иштирок этган. Бекатнинг алоҳида қурилиш қиймати очиқланмаган бўлса-да, Ер усти ҳалқа метро линияси лойиҳасининг умумий қиймати 354,36 миллион АҚШ долларини ташкил этган.
