АҚШ президенти Дональд Трамп Оқ уйдан қилган мурожаатида Хитойни 2020 йилги президентлик сайловига аралашишга уринганликда айблади. Унинг сўзларига кўра, буни тасдиқловчи юзлаб махфий разведка ҳужжатлари махфийликдан чиқарилган. Бу ҳақда BBC маълум қилди.
Трампнинг таъкидлашича, Хитой 220 миллион нафар сайловчининг шахсий маълумотларини ноқонуний йўл билан қўлга киритган. Шунингдек, у 18 штатдаги сайловчилар маълумотлари сотиб олингани, ўғирлангани ёки хакерлик ҳужумлари орқали эгалланганини иддао қилди.
Бироқ президент Хитой ушбу маълумотлардан сайлов натижаларига таъсир ўтказиш ёки овоз бериш тизимини ўзгартириш учун фойдаланганини тасдиқловчи ҳеч қандай далил тақдим этмади.
Вашингтондаги Хитой элчихонаси Reuters агентлигига берган баёнотида Пекин АҚШ президентлик сайловларига ҳеч қачон аралашмагани ва бундай ниятда ҳам эмаслигини билдирди.
Шу билан бирга, АҚШ разведка ҳамжамиятининг 2021 йилда эълон қилинган ҳисоботида Хитой 2020 йилги президентлик сайловига аралашмагани ҳақида "юқори даражадаги ишонч" билан хулоса қилинган.
Трамп мурожаати давомида АҚШдаги овоз бериш машиналари Россия, Хитой ва Эрон каби давлатлар томонидан ташқи аралашув учун "жуда ҳимоясиз" эканини ҳам иддао қилди.
Бундан ташқари, у Мичиганда демократик партияга алоқадор гуруҳ сайловчиларни рўйхатга олишда фирибгарлик қилганини, аммо ФБР терговга тўсқинлик қилганини айтди. Шунингдек, Ички хавфсизлик вазирлиги 278 минг нафар АҚШ фуқароси бўлмаган шахс сайловчилар рўйхатига киритилганини аниқлаганини маълум қилди. Аммо уларнинг овоз бергани ёки сайлов натижаларига таъсир кўрсатгани ҳақида ҳеч қандай далил келтирилмади.
