Тошкент вилояти Зангиота туманида 16 июль куни кечаси автомобилларга суюлтирилган газ қуйиш шохобчасида (АГТШ) содир бўлган портлашга хавфсизлик талабларининг бузилиши сабаб бўлган. Бу ҳақда Саноат, радиация ва ядро хавфсизлиги қўмитаси маълум қилди.
Қайд этилишича, шохобча фақат автомобилларга газ қуйиш фаолияти учун рухсат олган бўлишига қарамай, унда маиший газ баллонларига ҳам газ тўлдирилган.
Ҳодиса вақтида "Лабо" автомобилида олиб келинган 100 литрлик маиший газ баллонлари қўлбола тайёрланган мослама орқали тўлдирилаётган бўлган. Учинчи баллонни тўлдириш жараёнида шланг уланган жойидан чиқиб кетган ва чақнаш содир бўлган. Бу эса газ баллонларининг кетма-кет портлашига олиб келган.
Натижада икки дона газ баллони портлаган, тўрттаси ёнган. Ҳодиса оқибатида уч нафар фуқаро турли даражадаги куйиш жароҳатларини олган. Улардан бирининг аҳволи оғир бўлиб, танасининг 80 фоизи куйган, яна икки нафар жабрланувчи ўрта оғир ҳолатда.
Ҳозирда воқеа юзасидан қўмита мутахассислари ва ҳуқуқни муҳофаза қилувчи органлар вакиллари томонидан текширув ишлари олиб борилмоқда. Ҳолат бўйича жиноят иши қўзғатилган ва судга оид комплекс экспертиза тайинланган.
Қўмита АГТШ раҳбарларини маиший газ баллонларига газ тўлдириш тақиқлангани ҳақида огоҳлантирди. Фуқароларга эса баллонларни фақат ваколатли ташкилотлар орқали белгиланган тартибда тўлдириш тавсия этилди.
