Ўзбекистон ягона энергетика тизимида 17 июль куни электр энергияси истеъмоли ва ишлаб чиқариш ҳажми бўйича янги юқори кўрсаткич қайд этилди. Бу ҳақда Энергетика вазирлиги маълум қилди.
Вазирлик маълумотига кўра, ушбу кунда мамлакатда суткалик электр энергияси истеъмоли 293,4 миллион киловатт-соатни ташкил этган. Бу ўтган йил ёз мавсумида қайд этилган энг юқори кўрсаткичдан 20,8 миллион киловатт-соатга ёки 7,6 фоизга кўп.
Шунингдек, электр энергияси ишлаб чиқариш ҳажми ҳам рекорд даражага етди. 17 июль куни 296,1 миллион киловатт-соат электр энергияси ишлаб чиқарилган бўлиб, бу 16 июль куни ўрнатилган аввалги рекорддан 0,7 миллион киловатт-соатга юқори.
Кичик қувватли қуёш фотоэлектр станцияларида ишлаб чиқарилган электр энергияси ҳам ҳисобга олинганда, умумий ишлаб чиқариш ҳажми 305 миллион киловатт-соатни ташкил этган.
Энергетика вазирлиги таъкидлашича, диспетчерлик хизматлари электр тармоқларидаги юклама, узатиш линиялари ва трансформаторларнинг ҳолатини доимий назорат қилиб бормоқда. Зарур ҳолатларда ортиқча юкланишнинг олдини олиш учун тезкор чоралар кўрилмоқда.
