Россия армияси 19 июлга ўтар кечаси Киевга кенг кўламли ракета ва дрон ҳужумини уюштирди. The Guardian хабарига кўра, бу уруш бошланганидан буён пойтахтга қарши амалга оширилган энг йирик баллистик ҳужумлардан бири ҳисобланади. Бу ҳақда Zamon.uz хабар берди.
Маълум қилинишича, Россия Киев томон қарийб 40 та "Искандер-М" баллистик ва "Сиркон" гипертовушли ракеталарини учирган. Ҳужум беш соат давом этган. Украина ҳарбийлари 18 та ракета ва 125 та дрондан 108 таси йўқ қилинганини билдирган. Шунга қарамай, шаҳарнинг бир қатор ҳудудларида вайронагарчиликлар юз берган.
Энг катта талафот Шевченкивский туманида қайд этилди. Уч қаватли бинода чиққан ёнғин оқибатида бир киши ҳалок бўлган, яна етти киши жароҳатланган. Қутқарувчилар вайроналар остида қидирув ишларини давом эттирмоқда.
Ҳужум оқибатида турар жойлар, офис бинолари ва ётоқхоналарга ҳам зарар етган. Кучли портлаш тўлқини туфайли Лукяновская метро бекати вестибюлининг шипи қулаб тушган ва бекат вақтинча ёпилган.
Украина президенти Владимир Зеленский мамлакат учун баллистик ракеталардан ҳимояланиш масаласи янада долзарб бўлиб бораётганини таъкидлади. Унинг айтишича, Украинага Patriot ҳаво мудофаа тизимлари учун тутиб қолувчи ракеталар доимий равишда зарур.
Шу билан бирга, Украина ҳам Россия ҳудудларига жавоб зарбаларини амалга оширган. Зеленскийнинг маълум қилишича, Москва ва Тамбов вилоятларидаги логистика объектлари нишонга олинган. У ерларда дронлар ишлаб чиқаришда қўлланиладиган санкция остидаги бутловчи қисмлар ва навигация ускуналари сақлангани айтилмоқда.
БМТ маълумотларига кўра, 2026 йил июнь ойи Украинадаги тинч аҳоли учун 2022 йил апрелидан бери энг оғир ойлардан бири бўлган. Бир ой давомида камида 293 нафар тинч аҳоли ҳалок бўлган. Айни пайтда урушни тўхтатиш бўйича музокаралар натижа бермаяпти, фронтдаги вазият эса деярли ўзгаришсиз қолмоқда.
