Халқаро футбол федерацияси (FIFA) Жаҳон чемпионати финалида Испанияга қарши ўйиндан кейин Аргентина терма жамоаси футболчиларининг хатти-ҳаракатлари юзасидан текширув бошлади. Бу ҳақда EFE хабар берди.
Финал учрашуви қўшимча бўлимларда Испания терма жамоасининг 1:0 ҳисобидаги ғалабаси билан якунланган.
Учрашувдан кейин Аргентина терма жамоаси футболчиси Леандро Паредес аввал Испания ҳимоячиси Эрик Гарсиянинг бўйнидан ушлаган, кейин эса ярим ҳимоячи Гавини туртиб юборган. Шундан сўнг уни жамоадошлари тинчлантирган.
Яна бир баҳсли ҳолатда Аргентина ҳимоячиси Науэль Молина Испания терма жамоаси сардори Родри ғалабани нишонлаётган вақтда уни йиқитишга урингани айтилмоқда.
Бундан ташқари, Аргентина терма жамоаси мураббийлар штаби аъзоси Роберто Аяла Испания футболчиси Дани Олмонинг юзига мушт туширишга уринган.
Тақдирлаш маросими вақтида ҳам аргентиналик футболчиларнинг хатти-ҳаракатлари муҳокамаларга сабаб бўлди. Улар Испания терма жамоасига юз ўгириб, шоҳсупа томон йўл олган ва ўз мухлисларига қўллаб-қувватлагани учун миннатдорчилик билдирган.
Шу билан бирга, Испания терма жамоаси футболчилари кумуш медалларни қабул қилиш учун шоҳсупага кўтарилаётган аргентиналик футболчиларни ҳурмат рамзи сифатида йўлакчада саф тортиб кутиб олган.
FIFA текширув натижаларига кўра, интизомий чоралар кўрилиши мумкин.
