Мексика терма жамоасининг афсонавий дарвозабони Гильермо Очоа профессионал футболчилик фаолиятини якунлашга қарор қилди. 41 ёшли футболчи бу ҳақда ижтимоий тармоқдаги саҳифаси орқали маълум қилди.
"Бу орзу мени қанчалик узоққа олиб боришини ҳеч қачон тасаввур ҳам қилмаган эдим. Бугун эса ортимга фахр билан назар ташлаб, оиламга, жамоадошларимга ва ҳар бир қадамда мени қўллаб-қувватлаган барча мухлисларга миннатдорлик билдиришим мумкин. Мен миллионлаб инсонларнинг меҳри ва Мексика учун боримни берганимга бўлган ишончни ўзим билан олиб кетаман. Биз биргаликда бошдан кечирган лаҳзаларни ҳеч ким биздан тортиб ололмайди. Барчаси учун чин қалбимдан раҳмат", деб ёзди Очоа.
Гильермо Очоа тарихда 6 та Жаҳон чемпионати учун қайдномадан жой олган 3 нафар футболчидан бири ҳисобланади. Бироқ у мусобақанинг фақат 4 тасида — 2014, 2018, 2022 ва 2026 йилларда майдонга тушган. Дарвозабон 2006 ва 2010 йиллардаги турнирларда ҳам Мексика терма жамоаси таркибида бўлган, аммо бирорта учрашувда иштирок этмаган.
Очоа Жаҳон чемпионатларида жами 12 та учрашув ўтказиб, уларнинг 5 тасида ўз дарвозаси дахлсизлигини сақлаб қолган.
У Мексика миллий терма жамоаси сафида 154 та ўйинда майдонга тушган. Шунингдек, дарвозабон 6 марта КОНКАКАФ Олтин кубогида ғолиб чиққан ва 2021 йил Токиода ўтказилган Олимпиадада бронза медалини қўлга киритган.
2025 йилдан буён Кипрнинг "АЕЛ" клуби шарафини ҳимоя қилиб келган Очоа фаолияти давомида Мексиканинг "Америка", Испаниянинг "Малага" ва "Гранада", Италиянинг "Салернитана", Португалиянинг "АВС", Франциянинг "Аяччо" ҳамда Бельгиянинг "Стандард" клубларида тўп сурган.
