Wildberries компанияси Украина дронлари ҳужумлари оқибатида зарар кўрган сотувчиларга компенсация тўлашни бошлади. Бу ҳақда маркетплейс эгаси Татьяна Ким маълум қилди.
Унинг айтишича, Москва вилоятининг Электросталь шаҳридаги омборда товарлари шикастланган сотувчилар пул ўтказмаларини бир сутка ичида олиши мумкин. Компания, аввало, сони 88 мингдан ортиқ бўлган кичик ва ҳимоясиз тадбиркорларни қўллаб-қувватлашни режалаштирган.
Шунингдек, Wildberries "сотувлар симулятори"ни ишлаб чиқмоқда. Унга кўра, сотувчилар йўқотилган товарлари омбордан одатдагидек сотилгандек, маблағларни босқичма-босқич олиб боради.
Йирик сотувчилар учун эса компания махсус шартларда кредитлаш схемасини таклиф қилмоқда.
Бироқ дастлабки тўловлар амалга оширилганидан бир неча соат ўтиб, айрим сотувчилар компенсация миқдоридан норози бўлган. Тадбиркорлар Wildberries уларга йўқотилган товарлар қийматидан анча кам маблағ тўлаганини билдирган.
Компания эса тўловлар бир неча траншда амалга оширилишини маълум қилган.
Wildberries'даги манбага кўра, биринчи траншлар сотувчилар зарар кўрган товарларини тўлиқ сотиш орқали ишлаб топиши мумкин бўлган маблағнинг тахминан 10–15 фоизини ташкил этган. Таъкидланишича, бу тўловлар компания томонидан ихтиёрий равишда амалга оширилмоқда.
Шу билан бирга, Wildberries расман дронлар ҳужумлари оқибатида етказилган зарар учун жавобгарликни ўз зиммасига олмаган. Компания 7 июль куни оферта шартларига ўзгартириш киритиб, дронлар ҳужумини форс-мажор ҳолатлари қаторига қўшган. Бу эса компанияни товарлар қийматини қоплаш мажбуриятидан озод қилади.
Миллиардлаб рубллик товарлар йўқ қилинган
Соҳавий нашрлар экспертларининг баҳолашича, Москва ва Тамбов вилоятларидаги Wildberries омборларида 150–235 миллиард рубллик товарлар сақланган бўлиши мумкин.
Украина ҳужумлари оқибатида компаниянинг камида тўртта логистика маркази зарар кўрган. 19 июль куни Москва ва Тамбов вилоятларидаги логистика марказлари, 22 июль куни эса Краснодар ва Ставрополь ўлкасидаги омборлар ҳужумга учраган.
Ҳужумлар оқибатида тўққиз киши ҳалок бўлган, бир неча ўнлаб одамлар жароҳатланган.
