АҚШ ҳарбийлари Эронга қарши навбатдаги зарбаларни амалга оширди. Шу тариқа Вашингтоннинг Теҳронга қарши ҳужумлари кетма-кет 13-кеча давом этди. Бу ҳақда АҚШ Марказий қўмондонлиги (CENTCOM) маълум қилди.
Қайд этилишича, 23 июль оқшомида амалга оширилган сўнгги зарбалар икки соатдан ортиқ давом этган. Ҳужумлар давомида Эроннинг ҳарбий қўмондонлик марказлари, дронлар сақланадиган иншоотлар, алоқа тармоқлари, соҳил кузатув нуқталари ҳамда денгиздаги ҳарбий салоҳияти нишонга олинган.
CENTCOM ушбу зарбалар Эроннинг Ҳормуз бўғози орқали ҳаракатланаётган фуқаролик кемалари ва тижорат денгизчилиги учун туғдираётган хавфини камайтиришга қаратилганини билдирган.
АҚШ Президенти Дональд Трамп 23 июль куни Ямандаги ҳусийлар Қизил денгизда Саудия Арабистонига тегишли икки нефть танкерини нишонга олганидан сўнг Эрон ва унинг ҳусий иттифоқчиларига қарши “кескин ҳарбий жазо” қўлланилишини маълум қилган. Теҳрон эса Ҳормуз бўғозини ёпган.
Эрон Соғлиқни сақлаш вазирлиги вакилига кўра, АҚШнинг сўнгги зарбалари оқибатида 50 нафар тинч аҳоли ҳалок бўлган, 500 киши яраланган. АҚШ томонидан эса уруш давомида ҳалок бўлган ҳарбийлар сони 18 нафарга етган.
Трамп Эрон Ҳормуз бўғозидаги кемаларга ҳар бир ўқ узганида, АҚШ Эрон ҳудудидаги камида битта кўприк ёки электр станциясини йўқ қилишини айтган.
Эрон Қуролли кучлари қўшма қўмондонлиги бундай таҳдид амалга оширилган тақдирда, минтақадаги нефть, газ, электр энергетикаси ва бошқа иқтисодий инфратузилма объектларига зарба берилишини билдирган.
Сўнгги кунларда АҚШ Президенти Эрондаги нишонлар рўйхатини энергетика объектлари ва кўприклар ҳисобига кенгайтириш билан таҳдид қилиб келмоқда.
1949 йилги Женева конвенцияларига кўра, уруш вақтида аҳоли ҳаёти учун муҳим бўлган фуқаролик объектларига ҳужум қилиш тақиқланган. Халқаро ҳуқуқ бўйича америкалик экспертлар Трампнинг бундай объектларга зарба бериш ҳақидаги таҳдидлари халқаро ҳуқуқ нуқтаи назаридан ҳарбий жиноят сифатида баҳоланиши мумкинлигини билдирган.
Қайд этиш жоизки, уруш давомида АҚШ ва Исроилнинг Эронга, шунингдек, Исроилнинг Ливанга берган зарбалари оқибатида минглаб одамлар ҳалок бўлган, миллионлаб киши эса ўз уйини тарк этишга мажбур бўлган. Можаро нефть нархларининг ошиши ва жаҳон молия бозорларида беқарорликка сабаб бўлмоқда.
