Япония Иммиграция хизмати мамлакат ҳудудида ноқонуний яшаб келган икки нафар Ўзбекистон фуқаросини депортация қилди. Бу ҳақда Япониянинг Ўзбекистондаги элчихонаси хабар берди.
Маълум қилинишича, фуқаролардан бири Японияга "техник амалиётчи" визаси билан кирган. Виза муддати тугаганига қарамай, мамлакатни тарк этмаган ва кейинчалик ҳуқуқни муҳофаза қилувчи органлар томонидан ушланган.
Иккинчи фуқаро эса қисқа муддатли виза билан Японияга борган. У ҳам рухсат этилган муддат тугагач мамлакатда ноқонуний қолиб кетган ва кейинчалик ушланган.
Япониянинг Ўзбекистондаги элчихонаси мамлакатда ноқонуний яшаш ёки ноқонуний меҳнат фаолияти билан шуғулланган шахсларга нисбатан қатъий чоралар кўрилишини эслатди.
Унга кўра, қоидабузарлар полиция томонидан ушланиши, иммиграция марказига жойлаштирилиши ва кейинчалик депортация қилиниши мумкин.
Шунингдек, Япония ҳукумати қонунбузарлар ҳақидаги маълумотларни Ўзбекистон томонига ҳам тақдим этади. Шу боис, фуқаролар ватанга қайтгач, уларга нисбатан тегишли чоралар кўрилиши мумкинлиги таъкидланган.
