Қозоғистон президенти Қосим-Жомарт Тўқаев Россия президенти Владимир Путин билан учрашувда Украинадаги урушни вақтинча тўхтатиш ва “Истанбул формуласи 2.0” музокараларига қайтиш таклифини билдирди. Бу ҳақда Қозоғистон президенти матбуот хизмати хабар берди.
Учрашув 25 июль куни Россиянинг Омск шаҳрида бўлиб ўтган. Тўқаев Россия ва Украина ўртасидаги низони ҳал қилиш учун дипломатик ечим излаш зарурлигини таъкидлаган.
“Балким, бу низони аллақачон музлатиш ва “Истанбул формуласи 2.0”га қайтиш керакдир. Кейин эса буюк давлатлар кафолати остида тинчлик сари ҳаракат қилиш лозим”, — деди Тўқаев.
У Қозоғистон воситачи бўлиш ниятида эмаслигини, аммо можаронинг давом этиши икки давлат халқларига зарар етказаётганини қайд этди.
Тўқаев, шунингдек, Россия билан стратегик ҳамкорлик ва иттифоқчилик муносабатларига содиқлигини билдирган.
Қайд этилишича, Қозоғистон раҳбари Омск шаҳрига Қозоғистон ва Россия XXII Ҳудудлараро ҳамкорлик форумида иштирок этиш учун борган.
