Беларусга ишлаш учун борган Ўзбекистон фуқароси иш берувчи билан алоқа узилгани оқибатида оғир аҳволда қолди. У дипломатик ваколатхона ва Миграция агентлиги кўмагида Ўзбекистонга қайтарилди. Бу ҳақда Дуунё ахборот агентлиги хабар берди.
Маълум қилинишича, фуқаро М.Т. жорий йил июль ойида меҳнат фаолияти билан шуғулланиш мақсадида Беларусга йўл олган. Аммо Минск шаҳрига етиб боргач, уни ишга таклиф қилган шахс алоқага чиқмай қўйган. Бир неча кунлик уринишларга қарамай, иш берувчи билан боғланишнинг иложи бўлмаган ва фуқаро маблағсиз қолган.
Шундан сўнг у Ўзбекистоннинг Беларусдаги элчихонасига мурожаат қилиб, Ватанга қайтишда амалий ёрдам сўраган. Элчихона ходимлари зарур ҳужжатларни расмийлаштириб, Ўзбекистон Миграция агентлиги билан ҳамкорликда Миграция жамғармаси маблағлари ҳисобидан авиачипта олиб беришга кўмаклашган.
Натижада М.Т. 24 июль куни "Белавиа" авиакомпаниясининг Минск–Тошкент рейси орқали Ўзбекистонга қайтарилди.
