Маълум қилинишича, Оқ уйда ҳозирда Эронга нисбатан ҳарбий ҳаракатларни янада кучайтириш, Теҳронга қарши янги иқтисодий санкциялар жорий этиш орқали босимни ошириш ҳамда АҚШ ўз олдига қўйган мақсадларга эришганини эълон қилиб, можародан чиқиш каби вариантлар муҳокама қилинмоқда.
Нашр маълумотларига кўра, мазкур масала сўнгги ҳафталарда Дональд Трамп иштирокида ўтказилган ёпиқ йиғилишларда муҳокама қилинган. Унда АҚШ вице-президенти Жей Ди Вэнс, Мудофаа вазири Пит Ҳегсет, Бирлашган штаб бошлиқлари қўмитаси раиси генерал Дэн Кейн, президентнинг куёви Жаред Кушнер ҳамда махсус вакил Стив Уиткофф иштирок этган.
Қайд этилишича, беш ойдан буён давом этаётган можарога қарамай, Вашингтон ўз олдига қўйган асосий мақсадларга тўлиқ эриша олмаган. Хусусан, АҚШ Эрондаги сиёсий ҳокимиятни ҳарбий босим орқали ўзгартириш режасини амалга ошира олмагани таъкидланган.
Эслатиб ўтамиз, АҚШ ва Эрон ўртасидаги навбатдаги кескинлик жорий йилнинг 8 июль куни АҚШ томонидан Эрон ҳудудига берилган зарбалардан кейин кучайган эди. Вашингтон бу ҳужумларни Ҳормуз бўғозида тижорат кемасига қилинган ҳужумга жавоб сифатида изоҳлаган.
Шу куни Дональд Трамп Эрон билан амал қилиб келган ўт очишни тўхтатиш тартиби ўз кучини йўқотганини маълум қилган. Орадан кўп ўтмай, Теҳрон Баҳрайн, Қувайт, Бирлашган Араб Амирликлари, Қатар ва Иорданияда жойлашган АҚШ ҳарбий объектларига зарбалар берган.
24 июль куни томонлар ўзаро ҳужумларни тўхтатган бўлса-да, The New York Times нашри маълумотига кўра, Оқ уй ҳозирча можаронинг кейинги йўналиши бўйича якуний қарор қабул қилмаган. Нашрнинг ёзишича, учала сценарий ҳам амалда кўриб чиқилмоқда.
Аввалроқ Дональд Трамп Эронга қарши янги кенг кўламли зарбалар бериш режасини вақтинча ортга сургани ҳақида хабарлар тарқалган эди.
