Маълум қилинишича, 22 июль куни тонгда "112" қисқа рақамига Вобкент туманидаги хонадонлардан бирида оилавий жанжал содир бўлгани ҳақида хабар келиб тушган.
Аниқланишича, эр-хотин ўртасидаги можаро сабаб аёл уйдан чиқиб кетган, икки нафар вояга етмаган фарзанди эса қаттиқ маст ҳолатда бўлган отаси билан хонадон ичида қолган.
Воқеа жойига етиб келган профилактика инспектори эшик ичкаридан қулфлангани сабабли девордан ошиб, ҳовлига кирган. У аввало болаларни хавфсиз жойга олиб чиққан.
Шундан сўнг инспектор эркакни тинчлантиришга ҳаракат қилган. Бироқ у қўлига ошхона пичоғини олиб, томоғига тираган ҳолда ўз жонига қасд қилиш билан таҳдид қилган.
Вазият кескинлашганига қарамай, профилактика инспектори мулоқотни давом эттириб, психологик усуллар орқали эркакни чалғитишга эришган. Қулай фурсатдан фойдаланиб, унинг қўлидаги пичоқни олиб қўйган ва фуқарони зарарсизлантирган.
Ички ишлар вазирлигига кўра, профилактика инспекторининг тезкор ҳаракатлари натижасида икки нафар боланинг ҳаёти сақлаб қолинган ҳамда оғир оқибатларга олиб келиши мумкин бўлган ҳолатнинг олди олинган.
